2026–2030 онд боловсруулах үйлдвэрлэлийн салбарын хүний нөөцийг бэлтгэх зорилгоор Аж үйлдвэр, эрдэс баялгийн яам, Чингис хаан баялгийн сан нэгдэл, “Эрдэнэс ҮТП” ХХК, Шинжлэх Ухаан Технологийн Их Сургууль хамтран “Нүүрсний боловсруулалтын технологи” бакалаврын хамтарсан 2+2 хөтөлбөрийг хэрэгжүүлж байгаа билээ.
Тус тэтгэлэгт хөтөлбөрт шалгарсан 20 суралцагч 2026-2030 оны хичээлийн жилд эхний хоёр жилээ Шинжлэх Ухаан Технологийн Их Сургуульд, дараагийн хоёр жилээ БНХАУ-ын Уул уурхай, технологийн их сургуульд тэтгэлгээр суралцан төгсөх юм.
“Эрдэнэс ҮТП” ХХК-ний “Би инженер” төслийн хүрээнд хэрэгжиж буй тус хөтөлбөрийн сонгон шалгаруулалтын Ажлын хэсэг өнөөдөр хуралдлаа. Хурлаар 2+2 тэтгэлэгт хөтөлбөрт материалаа ирүүлсэн элсэгчдийн сонгон шалгаруулалтыг зохион байгуулах болон хугацаат төлөвлөгөөг хэлэлцэж баталлаа.
